ගිනියම් වූ නගරයේ
සිසිලස හොරාගත්
රූස්ස මාර ගහ යට
රතු මල් පලස උඩ
අතින් අත අල්ලා
කොඳුරන්නෙ හෙමිහිට
අතේ රේඛා ඔක්කොම
ඇහැ ඇතුළේ දවටගෙන
ඒ ඇහෙන් මේ ඇහැට
ඇසිපියන් නොවැටෙනා තරමට
ඉහළට ගත් හුස්ම
පපුවේම හිර කරන් ………..
පින්තූර අඳිමින් වචනයෙන්
හොඳ නරක එක විලසින්
සිතුවම් කරයි සැනෙකින්
සිත අඟුළු දමමින් …..
දොඩමළු වන වචන
හීන ඇතුළෙම හිර කර
නළලේ තිලකයට
මුවා වී ඔප වැටුන මායාව ……..
වත්සුණු අහිමි දෙකොපුල
දුවිල්ල සිත්තම් කළ
හිරු බසින හැල්මේ
පුරවා පසුම්බියේ මුල්ල
උරයක දමා අව පැහැ
උරුම වූ අරුම ශිල්පය
ගෙන යයි පොදිය කර මත
තැන තැන මවා මාළිග …………
