29 C
Colombo
Sunday, July 14, 2024
spot_img

Subscribe

Date:

Share:

දොරකඩට විත් සීනු හැඬවූ භූවිෂමතා – කවි දෙකක්

Related Articles

දිගුපුළුල නිල් කොළ සරැළි සායක්
ඉස්ලා නෙග්රා* වෙරළ වාටියෙත්
කුඩාතනෙයි** වෙරළ වාටියෙත්
කිරි පැහ සිනා පෙන බුබුළු රේන්දයක්
මත තැනින් තැන අපිළිවෙල මතුවූ සිප්පිකටු මෝස්තරයක්

දොරකඩට විත් සීනු හැඬවූ
භූවිෂමතා කවි දෙකක්
වෙරළකට පෙම් බැන්ඳ තරමක්
කවිවලට පෙම් බැන්ඳ තරමක්

විශ්ව අංජල්*** ෆැමිලි සිතුවමක
පින්තාරු කළ භූගෝල සිතියම
මරියෝ ජිමේනේසේ නම් වූ පැබ්ලෝ නෙරූදාගේ ලියුම්කාරයා****
නියඟලා කවි***** මලක් අත රැඳි
ඉලං⁣කෙයි තැපෑලේ ලියුම්කාරයා
කේතීශ්වරන් තේවරාජා******

ප්‍රේමය කවියක් නම්
මුහුදත්, මුහුදු වෙරළත්
ප්‍රේමය සසඳන, සාපේක්ෂ රූපක පෙළපාලියක් ය
මරියෝට වාගේ ම තේවාටත්

ගලාගෙනෙන යලිදු ඈතට දුවන
සිතිවිලි සරැළි පිනුම් ගහන සාගරයක්
මරියෝට වාගේ ම තේවාටත්

නෙරූදාගේ ලියුම්කාරයා
මරියෝ ජිමේනේසේ******* ම නොවුණත් කේතීශ්වරන් තේවරාජා පාරිසරිකාලංකාරයක පෙම්වත් රූපකයක්
තේවා, හසුන් තුඩින් ගත් විහඟුන්
අත⁣රේ අපූරු ම විහඟෙක්
ලවන සුළං රැලි එතූ
රෝද තටු දෙකක් ලැබූ

‘එගොඩ මෙගොඩ
සිනා කඳුළු නිකුත්කරන
එලොව මෙලොව
සිහින අයදුම් කරන
හසුන්පත් වලට සේම තේවා,
කුඩාතනෙයි සුරූපිනී
වෙරළාලනීටත් පෙම් බැන්ඳා  
නොරිදා ඇගේ රන්වන් සිරුර වින්ඳා
දේවාන්දෙලා ඇගේ රන්වන් සිරුර බින්ඳා
නියඟලා මලක,
සංකේතීය විරෝධය නම් වූ
කේතීශ්වරන් තේවරාජාගේ සිරස බින්ඳා

ප්‍රේමයේ රූපක කියාදුන්
නෙරූදාගේ පිහිටෙන් ඉදිකෙරූ
මරියෝ ජිමේනේසේගෙ  වැලි මාලිගාව
බියට්‍රිස් ගොන්සාලේස්********,
අත්තිවාරම පුපුරවන්න හැදුවේ
බියට්‍රිස්ගේ අම්මා
රෝසා ගොන්සාලේස්*********

කේතීශ්වරන් තේවරාජා වැල්ලෙ වැලි මාලිගා තැනුවා
දේවාන්දෙලා වැලිවලින් රුවන් මාලිගා තැනුවා

දොරකඩට විත් සීනු හැඬවූ කවියේ
සිරස බින්ඳා
දේවාන්දෙලා  දේවාරූඩෙන්  

විල්දහයක් මාල පැළඳි සදාහරිත ප්‍රේමේ
⁣කුඩාතනේ වෙරළාලනීට විතරක් නැති අරුමේ

මරියෝ යතාවට ළං වෙද්දී
තේවා ප්‍රබන්ධයේ ම ගිලුණී

පැසිපික් සාගරයේ ඉස්ලා නෙග්රාවේ ආදර රැළි නැගුණී
දඹදිව් භාරත් සාගරයේ කුඩාතනෙයි වැළලූ පාරිසරික ප්‍රේමේ

අංජල් මුට්ටි කාසි සංගම් නහුතයක් ම ති⁣බිණී
තේවාගෙ තේවාව ම ලංකා රුපියලකට ඇද වැටුණී

* පැබේලෝ නෙරූදා කවියාගේ පදිංචිය.

**  අලංකාර වැලි නිදියක් පිහිටා තිබූ ලංකාවේ උතුරේ වෙරළකි.

***තැපෑලට දෙමළ භාෂාවෙන් ව්‍යවහාර වේ.

****අන්තෝනියෝ ස්කර්මෙතාගේ THE POSTMAN කෙටි නවකතාවේ සිංහල පරිවර්තනය ලියනගේ අමරකීර්ති. ඔහුගේ පරිවර්තනය ද නිමිත්තක් විය.

*****වෘත්තියෙන් තැපැල්කරුවෙකු වූ කේතීශ්වරන් තේවරාජා, කුඩාතනෙයි වෙරළේ සිදුකළ වැලි මංකොල්ලයට එරෙහිවූ හුදකලා සටන්විරුවෙකි. එනිසා ම 2010 දී තේවාව ඝාතනය කළේය. ඔහුගේ ඝාතනය සිදුවී දසවසරක් සපිරෙද්දී ප්‍රවීන කිවිවර මංජුල වෙඩිවර්ධන ‘නියඟලා කවි’ නමින් තේවාගේ පාරිසරික හටන් සවුන්දර්ය වර නැගුවේය.

******මංජුලගේ ‘නියඟලා කවි’ නිර්මාණයේ කතානායකයා.

*******ලියනගේ අමරකීර්ති සිංහලට පරිවර්තනය කළ ‘නෙරූදාගේ ලියුම්කාරයා’ හි ප්‍රධාන පාත්‍රයා.

********එකී ප්‍රබන්ධයේ ම පාත්‍රයෙකි. මරියෝගේ පෙම්වතියයි.

*********එකී ප්‍රබන්ධයේ ම උක්ත පාත්‍රයාගේ අම්මා. 

Sarathchandra Walpola
Sarathchandra Walpola
Writer, Director, Journalist

LEAVE A REPLY

Please enter your comment!
Please enter your name here

Popular Articles