පාන්දර ඉඳං අද
හොඳටෝම චුරු චුරුව
වහිනවා වහිනවා වහිනවා
දොට්ට පිළකට යන්නෙවත් කොහොමද
ගංවතුර මේ සැරේ දානවා
කොලපොතක් කපලාවත්
ගහන්නට වෙයි නේද
වැහිපීලි උතුරලා ගලනවා
සොල්දරේ උඩත් දැං හොඳටෝම තෙමෙනවා
හුළං කෝඩෙට වැස්ස වහින්නෙම හරහටනෙ
පැල ගහේ කරටියත් වැනෙනවා
ගිනිකූරු ගහේ නං අතු හයිය නැහැ බයයි
දුන්න වගේ වහලෙට ම නැමෙනවා
වියපු පොල් අතු ටිකත්
හෙවිල්ලුවෙ නැහැ එදා
අන්න දැං ලිප දෝරේ ගලනවා
දුංකාලා ඇස් දෙකත් රිදෙනවා
සිමියොන්ගෙ බස් එකත්
මයෙ හිතේ ආවේ නෑ
චීනගහ බෝක්කුව උඩින් සැඩපාර ඇති
වැහිකළුව තව තවත් පුරනවා
රතු වැස්සි තෙමිලාම සන්නියක්වත් හැදෙයි
පැටියාත් මහවෙලේ තෙමෙනවා
බකිනිගහ ලියැද්දේ කඩාඩුව කඩාගෙන
මෙලහකට කැප්පුඇළ ගලනවා
මේ සැරේ කරුමයක් ගෙවෙනවා
වැස්සන නං දිගටෝම වහිනවා…
පුෂ්පලාල් පෙරේරා
